Sitrang Cyclone : बंगालच्या उपसागरावर कमी दाबाचा पट्टा तयार झाला आहे. यामुळेच या दाबाचे चक्रीवादळात रूपांतर होण्याची शक्यता आहे. हवामान विभागाद्वारे अनेक राज्यांना अलर्ट देण्यात आला आहे.
उत्तर अंदमान समुद्र आणि लगतच्या दक्षिण अंदमान समुद्र आणि आग्नेय बंगालच्या उपसागरावर कमी दाबाचे क्षेत्र तयार झाले आहे. सतर्कतेचा इशारा देताना हवामान खात्याने सांगितले की, या दाबाचे चक्रीवादळात (Cyclone) रूपांतर होण्याची शक्यता आहे. 25 ऑक्टोबरला ते पश्चिम बंगाल-बांगलादेश किनारपट्टीवर पोहोचण्याची शक्यता आहे. या चक्रीवादळाला ‘सितरंग’ असे नाव देण्यात आले आहे.
हवामान खात्याने सांगितले की, वादळामुळे (Sitrang Cyclone) ताशी 110 किलोमीटर वेगाने वारे वाहू शकतात. पश्चिम बंगालमध्ये हलक्या ते मध्यम पावसाची शक्यता आहे. तथापि, कोलकाता हवामान केंद्राचे उपमहासंचालक संजीव बंदोपाध्याय यांनी सांगितले की, ते तीव्र चक्रीवादळ असणार नाही. त्याच वेळी, 26 ऑक्टोबर रोजी विविध ठिकाणी अतिवृष्टीची शक्यता आहे.
या ठिकाणी पावसाची शक्यता
नागालँड, मणिपूर, मिझोराम आणि त्रिपुरामध्ये असाच पाऊस पडण्याची शक्यता हवामान खात्याने व्यक्त केली आहे. हा दाब 22 ऑक्टोबरच्या आसपास पश्चिम-वायव्य दिशेने सरकण्याची शक्यता आहे. ते 23 ऑक्टोबर रोजी बंगालच्या उपसागरात पोहोचू शकते. त्याचे हळूहळू चक्री वादळात रूपांतर होण्याची शक्यता आहे.
सितरंग
बंगाल सरकारने अनेक जिल्ह्यांतील सखल भागातील लोकांना बाहेर काढण्यास सुरुवात केली आहे, तर ओडिशाने आपल्या अनेक किनारी जिल्ह्यांमध्ये सतर्कता वाढवली आहे. पश्चिम बंगाल आणि बांगलादेश या दोन्ही राज्यांमध्ये सोमवारी कालीपूजा आणि मंगळवारी दिवाळी साजरी केली जाईल. अशा स्थितीत येथील जनतेसाठी आधीच सावधानतेचा इशारा देण्यात आला आहे.
हवामान खात्याच्या म्हणण्यानुसार, हे वादळ शनिवारी पश्चिम-वायव्य दिशेकडे सरकण्याची आणि आग्नेय आणि लगतच्या पूर्व-मध्य बंगालच्या उपसागरात कमी दाबामध्ये केंद्रित होण्याची शक्यता आहे. वायव्य दिशेकडे सरकत, रविवारी पूर्व-मध्य आणि लगतच्या आग्नेय बंगालच्या उपसागरावर खोल दाबामध्ये तीव्र होण्याची दाट शक्यता आहे.
