मुंबई : इंडियन प्रीमियर लीगच्या 15 व्या हंगामात सर्व संघांनी प्रत्येकी एक सामना खेळला आहे. या मोसमात आतापर्यंत झालेल्या सामन्यांमध्ये फलंदाज आणि गोलंदाज दोघांचेही वर्चस्व राहिले आहे. काही संघांनी 200 पेक्षा जास्त धावा केल्या आहेत, तर काही 128 सारख्या कमी धावसंख्येवर बाद झाले आहेत. त्यामुळे दरवेळेप्रमाणेच यंदाही पर्पल कॅपसाठी गोलंदाजांमध्ये स्पर्धा आहे. सध्या आरसीबीकडून खेळत असलेला वानिंदू हसरंगा पर्पल कॅपधारक आहे. त्याच्याकडे 2 सामन्यात 5 विकेट्स आहेत, त्यापैकी त्याने एकाच सामन्यात 4 विकेट्स घेतल्या आहेत. हसरंगाने कोलकाताविरुद्ध ४ विकेट घेत संघाला विजय मिळवून देण्यात महत्त्वाची भूमिका बजावली होती.
कोलकाताचा वेगवान गोलंदाज उमेश यादव या यादीत दुसऱ्या क्रमांकावर आहे, ज्याने 2 सामन्यात 4 बळी घेतले आहेत. दोन्ही सामन्यात उमेशने पॉवरप्लेमध्ये आपल्या संघाला विकेट्स मिळवून दिल्या आहेत. उमेश गेल्या काही महिन्यांपासून टीम इंडियातून बाहेर आहे, त्यामुळे त्याची ही कामगिरी त्याच्या पुनरागमनाचा मार्ग मोकळा करू शकते.
या यादीत चेन्नई सुपर किंग्जचा गोलंदाज ड्वेन ब्राव्हो तिसऱ्या क्रमांकावर पोहोचला आहे. लखनऊविरुद्ध खेळल्या गेलेल्या सामन्यात ब्राव्होने एक विकेट घेत 171 विकेट्सचा आकडा गाठला आहे. इतकेच नाही तर आता त्याने आयपीएलच्या इतिहासात सर्वाधिक विकेट घेण्याच्या बाबतीत लसिथ मलिंगालाही मागे टाकले आहे. चौथ्या क्रमांकावर असलेल्या आकाशदीपची उपस्थिती सांगते की आयपीएल युवा खेळाडूंना त्यांचे कौशल्य दाखवण्याची संधी कशी देते. त्याने 2 सामन्यात 4 बळी घेतले असून पहिल्या दोन सामन्यात त्याने आपल्या गोलंदाजीने छाप पाडली आहे. या यादीत दिल्लीचा कुलदीप यादव 3 विकेट्ससह 5 व्या स्थानावर आहे तर टीम साऊथी 6 व्या क्रमांकावर आहे, त्याच्या नावावर 3 विकेट आहेत जे त्याने RCB विरुद्ध घेतले होते.
गेल्या मोसमाबद्दल बोलायचे झाले तर, वेगवान गोलंदाज हर्षल पटेलच्या नावावर पर्पल कॅप होती. सध्या तो या यादीत नाही, स्पर्धा जसजशी पुढे जाईल तसतसा हर्षल पटेलचाही यात प्रवेश होईल, अशी अपेक्षा आहे. या यादीत सध्या दोन फिरकी गोलंदाज आणि तीन वेगवान गोलंदाजांनी पहिल्या पाचमध्ये स्थान मिळवले आहे.
