मुंबई : इंडियन प्रीमियर लीगच्या या मोसमात मुंबई इंडियन्सच्या अडचणी कमी होण्याचे नाव घेत नाहीये. एकीकडे जिथे संघाला ५व्या पराभवाला सामोरे जावे लागले आहे, तर दुसरीकडे स्लो ओव्हर रेटमुळे कर्णधार रोहित शर्मासह सर्व खेळाडूंना दंड ठोठावण्यात आला आहे. पंजाबविरुद्ध खेळल्या गेलेल्या सामन्यात स्लो ओव्हर रेटसाठी मुंबईच्या कर्णधाराला 24 लाख रुपये, तर उर्वरित संघाला 6 लाख रुपये किंवा मॅच फीच्या 25 टक्के दंड ठोठावण्यात आला आहे. या मोसमात रोहित शर्माची ही दुसरी स्लो ओव्हर रेट पेनल्टी आहे.
तत्पूर्वी, पंजाबविरुद्धच्या महत्त्वपूर्ण सामन्यात मुंबईचा संघ मैदानात उतरला तेव्हा शिखर धवन आणि मयंक अग्रवाल यांच्या अर्धशतकांच्या जोरावर पंजाबने 198 धावांची सन्मानजनक धावसंख्या उभारली. प्रत्युत्तरादाखल, पुन्हा एकदा मुंबईची सलामी जोडी चमत्कार करू शकली नाही, असे असतानाही संघ एकेकाळी विजयाकडे वेगाने वाटचाल करत होता. पण शेवटच्या काही षटकांत दोन धावा आणि त्यानंतर सूर्यकुमार यादवची विकेट मुंबईला सामन्यापासून दूर नेले. या मोसमातील मुंबईचा हा सलग पाचवा पराभव आहे.
इथून संघाला प्लेऑफमध्ये पोहोचणे खूप कठीण आहे. मात्र, 2014 मध्ये संघाने अशा परिस्थितीतून एकदाच प्लेऑफपर्यंतचा प्रवास केला आहे. पण तेव्हा मुंबईचा संघ वेगळा आणि मजबूत असायचा. आता या संघात ट्रेंट बोल्ट आणि पांड्या ब्रदर्सची उणीव स्पष्टपणे दिसून येत आहे. अशात जसप्रीत बुमराह देखील चांगल्या लयीत दिसत नाही.
याशिवाय सूर्यकुमार यादव वगळता एकाही फलंदाजाला मोठी धावसंख्या करता आली नाही. या सामन्यात बेबी एबी डिव्हिलियर्स या नावाने प्रसिद्ध असलेल्या डेवाल्ड ब्रेव्हिसने 25 चेंडूत 49 धावांची दमदार खेळी करत मुंबईला सामन्यात पुनरागमन मिळवून दिले असले तरी मुंबईला विजय मिळवता आला नाही. मुंबईचा पुढचा सामना 16 एप्रिलला लखनऊशी होणार आहे.
