आयपीओ (IPO) मध्ये गुंतवणूक करणाऱ्या किरकोळ गुंतवणूकदारांना सिक्युरिटीज अँड एक्सचेंज बोर्ड ऑफ इंडियाने (Securities and Exchange Board of India) मोठी भेट दिली आहे. याशी संबंधित नियमांमध्ये एक मोठा बदल करण्यात आला आहे, जो छोट्या गुंतवणूकदारांसाठी खूप फायदेशीर ठरू शकतो.
UPI पेमेंट मर्यादा वाढवली –
जर तुम्ही किरकोळ गुंतवणूकदार असाल आणि कंपनीच्या IPO मध्ये गुंतवणूक करण्यासाठी युपीआय (UPI) द्वारे पैसे देत आहात. तर आता सेबीच्या नवीन नियमांनुसार तुम्ही 5 लाख रुपयांपर्यंतच्या बोली सादर करू शकता.
सध्या ही मर्यादा दोन लाख रुपये आहे. ही नवीन मर्यादा 1 मे नंतर येणाऱ्या सर्व IPO साठी वैध असेल. SEBI च्या परिपत्रकात म्हटले आहे,
IPO साठी बोली लावणाऱ्या सर्व किरकोळ गुंतवणूकदारांनी Rs 5 लाखांपर्यंतच्या बोलीसाठी UPI पेमेंट वापरावे. ते त्यांच्या अर्जात त्यांचा UPI ID देखील देऊ शकतात, असा निर्णय घेण्यात आला आहे
NPCI ने मर्यादा वाढवली आहे –
NPCI ने UPI पेमेंट व्यवहारांचे नियम बदलल्यानंतर SEBI चा हा निर्णय सुमारे 4 महिन्यांनी आला आहे. नॅशनल पेमेंट कॉर्पोरेशन ऑफ इंडिया (National Payment Corporation of India) ने UPI द्वारे प्रति व्यवहार मर्यादा 2 लाख रुपयांवरून 5 लाख रुपये केली आहे.
तर SEBI ने नोव्हेंबर 2018 मध्येच IPO मधील गुंतवणुकीसाठी UPI चे पेमेंट (Payment) करण्याची परवानगी दिली होती, जी 1 जुलै 2019 पासून लागू आहे.
तसेच मंगळवारी सेबीच्या परिपत्रकात, एनपीसीआयने या नवीन व्यवस्थेसाठी तयार असलेल्या यंत्रणेचा आढावा घेतल्याचे स्पष्ट केले आहे. त्याच वेळी, 80% इंटरमीडिएट (Intermediate) च्या नवीन नियमांनुसार बदल करण्याची पुष्टी देखील केली गेली आहे.
